မြန်မာအသင်းနဲ့ မြန်မာပရိသတ်တွေ ဇာတိသွေးမာန် ပြရမယ့်အချိန်

မြန်မာအသင်းနဲ့ မြန်မာပရိသတ်တွေ
ဇာတိသွေးမာန် ပြရမယ့်အချိန်

■ Written by : မြတ်ထွဋ်

လာမယ့် ဒီဇင်ဘာ (၄) ရက် (တနင်္ဂနွေနေ့)၊ ညနေ(၆)နာရီမှာ ထိုင်းအသင်းနဲ့ မြန်မာအသင်းတို့ ရန်ကုန်မြို့က သုဝဏ္ဏကွင်းမှာ ၂၀၁၆ ဆူဇူကီးဖလားပြိုင်ပွဲရဲ့ ဆီမီးဖိုင်နယ် ပထမအကျော့ပွဲစဉ်ကို ကစားကြတော့မှာပါ။ မြန်မာပရိသတ်တွေအနေနဲ့ ထိုင်းလက်ရွေးစင် အသင်းနဲ့ မြန်မာလက်ရွေးစင်အသင်းတို့ရဲ့ယှဉ်ပြိုင်မှုကို မိမိတို့ရဲ့အိမ်ကွင်းမှာ ဆယ်စုနှစ် (၄) ခုကျော်ကြာအတွင်း ပထမဦးဆုံးအကြိမ်အဖြစ် ကြည့်ရှုရမှာဖြစ်ပါတယ်။ ထိုင်းဘောလုံးအသင်းတွေဟာ မြန်မာနိုင်ငံကို မကြာခဏလာရောက်ကစားခဲ့ဖူးပေမယ့် သက်တမ်းအလိုက် အသင်းတွေနဲ့ ညွန့်ပေါင်းအသင်းတွေသာ လာရောက်ကြတာဖြစ်ပြီး လက်ရွေးစင်အသင်းကြီး အနေနဲ့ နောက်ဆုံးလာရောက် ကစားခဲ့တာက ၁၉၇၂ မြူးနစ် အိုလံပစ် ခြေစစ်ပွဲမှာဖြစ်ပါတယ်။ အာရှဇုန် (၂) ခြေစစ်ပွဲအဖြစ် ရန်ကုန်မြို့၊ အောင်ဆန်းကွင်းမှာ ကျင်းပခဲ့တာဖြစ်ပြီး မြန်မာ၊ ထိုင်း၊ သီရိလင်္ကာ (ထိုစဉ်ကသီဟိုဠ်)၊ အိန္ဒိယ၊ အစ္စရေး၊ အင်ဒိုနီးရှားအသင်းတွေ ယှဉ်ပြိုင်ခဲ့တာပါ။ အဲဒီတုန်းက နောက်ဆုံးဗိုလ်လုပွဲမှာ မြန်မာနဲ့ထိုင်းတို့ ဆုံတွေ့ခဲ့ကြပြီး မြန်မာ အသင်းက (၁-၀) ဂိုးနဲ့ အနိုင်ရရှိခဲ့တာကြောင့် အနောက်ဂျာမနီနိုင်ငံမှာ ကျင်းပတဲ့ မြူးနစ်အိုလံပစ်ပြိုင်ပွဲကို ၀င်ရောက်ယှဉ်ပြိုင်ခွင့် ရရှိခဲ့ပါတယ်။

■ မြန်မာ့မြေပေါ်မှာ မြန်မာကို မနိုင်ဖူးသေးတဲ့ ထိုင်းအသင်း

နိုင်ငံတကာ ဘောလုံးစာရင်းမှတ်တမ်းပြုစုရေးအဖွဲ့ (RSSSF) နဲ့ မြန်မာဘောလုံးသမိုင်း မှတ်တမ်းစာအုပ်ပါ အချက်အလက်တွေအရ ထိုင်းလက်ရွေးစင်အသင်းဟာ မြန်မာနိုင်ငံမှာ စုစုပေါင်း ပွဲစဉ် (၄) ပွဲသာ လာရောက်ကစားခဲ့ဖူးပြီး ၁၉၆၉ ကျွန်းဆွယ်ပြိုင်ပွဲတုန်းက (၂) ပွဲ၊ အထက်မှာရေးခဲ့တဲ့ ၁၉၇၂ မြူးနစ်အိုလံပစ်ခြေစစ်ပွဲမှာ (၂)ပွဲ လာရောက်ကစားခဲ့တာဖြစ်ပါတယ်။ ထိုင်းလက်ရွေးစင် အသင်းအနေနဲ့ မြန်မာ့မြေမှာ နိုင်ပွဲတစ်ကြိမ်တစ်ခါမှ မရခဲ့ဖူးဘဲ (၁) ပွဲသာ သရေကျကာ (၃) ပွဲရှုံးနိမ့်ခဲ့ပါတယ်။ ၁၉၆၉ကျွန်းဆွယ် (ဘောလုံး) ပြိုင်ပွဲ၊ အုပ်စုပွဲစဉ်မှာ (၁-၁) ဂိုးနဲ့ သရေကစားခဲ့ပြီး ဗိုလ်လုပွဲမှာ အိမ်ရှင်မြန်မာ အသင်းကို (၃-၀) ဂိုးနဲ့ရှုံးနိမ့်ခဲ့တာပါ။ ၁၉၇၂ မြူးနစ်အိုလံပစ်ခြေစစ်ပွဲမှာလည်း ဗိုလ်လုပွဲမတိုင်ခင် အုပ်စုအဆင့်မှာဆုံတွေ့ခဲ့ပြီး မြန်မာအသင်းက ထိုင်းအသင်းကို (၇-၀) ဂိုးနဲ့ပြတ်ပြတ်သားသား အနိုင်ယူပြီးတော့ ဗိုလ်လုပွဲမှာ (၁-၀) ဂိုးနဲ့ထပ်အနိုင်ယူခဲ့ပါတယ်။ အဲဒီတုန်းက ခြေစစ်ပွဲဝင် (၆) သင်းကို နှစ်အုပ်စုခွဲပြီး ပြိုင်ပွဲအသွင်ကစားခဲ့ရာမှာ တစ်အုပ်စုတည်းကျတဲ့ မြန်မာနဲ့ထိုင်းတို့ ဗိုလ်လုပွဲမှာ ထပ်တွေ့ခဲ့တာပါ။ (မြန်မာ ၇-၀ ထိုင်းပွဲမှာ တစ်ဂိုးသွင်းယူခဲ့တဲ့ ဦးခင်မောင်တင့်ဟာ ၂၀၀၅ ယူ - ၁၇ အာဆီယံ ချန်ပီယံရှစ်ပြိုင်ပွဲမှာ မြန်မာယူ - ၁၇အသင်းကို နည်းပြချုပ်အဖြစ် ကိုင်တွယ်ခဲ့ပြီး ထိုင်းမြေမှာ ထိုင်းအသင်းကို ပယ်နယ်တီနဲ့ အနိုင်ယူပြီး မြန်မာယူ - ၁၇ အသင်းဗိုလ်စွဲအောင် စွမ်းဆောင်ပေးနိုင်ခဲ့ပါတယ်။)

လက်ရွေးစင်အသင်းအဆင့်မှာ မြန်မာအသင်းအနေနဲ့ ထိုင်းအသင်းကို နောက်ဆုံးနိုင်ခဲ့တာ စင်ကာပူနိုင်ငံမှာ ၁၉၈၃ ခုနှစ်က ကျင်းပခဲ့တဲ့ (၁၂) ကြိမ်မြောက် ဆီးဂိမ်းစ်ပြိုင်ပွဲမှာဖြစ်ပြီး အဲဒီတုန်းက အုပ်စုပွဲစဉ်မှာ (၁-၀) ဂိုးနဲ့ အနိုင်ရရှိခဲ့တာပါ။ မြန်မာအသင်းအနေနဲ့ ၁၉၈၃ ခုနှစ်နောက်ပိုင်း ထိုင်းနဲ့တွေ့တဲ့ (၁၈) ကြိမ်မှာ (၅) ပွဲသရေကျပြီး (၁၃) ပွဲရှုံးနိမ့်ခဲ့ပါတယ်။ မြန်မာလက်ရွေးစင် အသင်းအနေနဲ့ ၂၀၀၀ ပြည့်နှစ် နောက်ပိုင်းနှစ်တွေမှာ ထိုင်းကိုအနိုင်မရတာ မှန်ပေမယ့် ခြေရောဂိုးရော ပြတ်ပြတ်သားသားရှုံးတာဆိုလို့ အတော်နည်းပါတယ်။ ၂၀၁၂ ဆူဇူကီးဖလားပြိုင်ပွဲမှာ (၀-၄) ဂိုးအထိ ဂိုးပြတ်အရေးနိမ့်ခဲ့တဲ့ ပွဲကလွဲလို့ နောက်ပိုင်းပွဲတွေမှာ ထိုင်းအသင်းကို အခက်တွေ့အောင် ယှဉ်ကစားနိုင်ခဲ့ပါတယ်။ ဒီနောက်ပိုင်းနှစ်တွေမှာ မြန်မာ အသင်းကို သိသိသာသာ အသာရလာတဲ့အသင်းက ဗီယက်နမ်အသင်းဖြစ်ပြီး ဗီယက်နမ်နဲ့တွေ့ရင် သူတို့ရဲ့အမြန်နှုန်းကို မြန်မာကစားသမားတွေ မထိန်းချုပ်နိုင်တာကြောင့် ရုပ်ပျက်ဆင်းပျက်ဖြစ်ပြီး ဂိုးပေးရတာလည်း များခဲ့ပါတယ်။ ထိုင်းအသင်းကိုတော့ ရှုံးသည့်တိုင် သူတင်ကိုယ်တင် ကစားနိုင်ခဲ့ပြီး သိက္ခာရှိရှိ ရှုံးနိမ့်တာများပါတယ်။ မြန်မာအသင်းအနေနဲ့ ၂၀၀၀ ခုနှစ်နောက်ပိုင်းကစားခဲ့တဲ့ လက်ရွေးစင်အဆင့်ပွဲစဉ်တွေမှာ ထိုင်းနဲ့ (၆) ကြိမ်ဆုံတွေ့ခဲ့ပြီး (၃)ပွဲကို သရေခံကစားနိုင်ခဲ့ပါတယ်။ ၂၀၀၆ မာဒေးကား ဖလားပြိုင်ပွဲမှာဆိုရင် အုပ်စုအဆင့်မှာ ထိုင်းကိုခြေရည်တူကစားနိုင်ခဲ့ပြီး (၂-၂) ဂိုးရလဒ်နဲ့ သရေကျခဲ့ပါတယ်။ ၂၀၀၇ အာဆီယံချန်ပီယံရှစ် ပြိုင်ပွဲမှာလည်း အုပ်စုအဖွင့်ပွဲမှာ (၁-၀) ဂိုးနဲ့ ဦးဆောင်ခဲ့ပြီး နာကျင်အချိန်ပို (၉၄) မိနစ်ရောက်မှ ချေပဂိုးပြန်ပေးခဲ့ရလို့ ထိုင်းကို နှစ်ပေါင်းရှည်ကြာ နိုင်ပွဲမရတာကို အဆုံးမသတ်နိုင်ခဲ့တာပါ။

■ ထိုင်းအသင်းရဲ့အမြန်ပေး Tik-Tok

ထိုင်းလက်ရွေးစင်အသင်းကို လက်ရှိမှာ မြန်မာပရိသတ်တွေနဲ့မစိမ်းတဲ့ ကိုင်တီဆက်က ကိုင်တွယ်လျက်ရှိနေပြီး သူ့လက်ထက်မှာ Tik-Tok ဆိုတဲ့နည်းဗျူဟာနဲ့ ကစားစေလျက်ရှိပါတယ်။ Tik-Tok ဆိုတာ အမှန်တကယ်တော့ ဘာစီလိုနာနဲ့ စပိန်လက်ရွေးစင် အသင်းကို အောင်မြင်မှုတွေ အမြောက်အမြားရရှိစေခဲ့တဲ့ Tiki-Taka ကစားဟန်ကိုပဲ အခြေခံတာပါ။ ကလပ်အသင်း ဘောလုံးလောကမှာ ဘာစီလိုနာ၊ နိုင်ငံတကာဘောလုံးလောကမှာ စပိန်လက်ရွေးစင် အသင်းတို့ အောင်မြင်မှုတွေ မရယူခင်ကတည်းက ထိုင်းအသင်းဟာ ဘောလုံးပိုင်ဆိုင်မှုကို ဦးစားပေးတဲ့ Possession Football ကိုကစားခဲ့တာပါ။ အရှေ့တောင်အာရှ ဘောလုံးလောကမှာ အောင်မြင်မှုတွေ ဆက်တိုက်ရယူခဲ့စဉ်အချိန်က ပြိုင်ဘက်အသင်းတွေကို ဘောလုံးပိုင်ဆိုင်မှုနဲ့ High-Pressing လုပ်ပြီး ဖိကစားတဲ့နည်းဗျူဟာနဲ့ ထိုင်းတို့ အနိုင်ယူခဲ့တာပါ။ ခေတ်သစ်ဘောလုံးလောကမှာ Tiki-Taka ကစားဟန်အောင်မြင်လာတဲ့အချိန်မှာ မူလကတည်းက ဒီပုံစံနဲ့ယဉ်ပါးတဲ့ ထိုင်းအသင်းဟာ Tiki-Taka ကိုပုံတူကူးချခဲ့ပြီး ကိုင်တီ ဆက်လက်ထက်မှာတော့ Tik-Tok နည်းဗျူဟာဖြစ်လာပါတယ်။ အမှန်တော့ Tik-Tok ဆိုတာ “နာရီသံချက်ချက်ညံ” ဆိုသလိုပဲ နာရီစက္ကန့် လက်တံသွားတဲ့အခါ မြည်တဲ့အသံကို မြည်သံစွဲအဖြစ် ယူထားတာပါ။ Tick-Tock ဆိုတဲ့ စကားလုံးကနေ ဆင်းသက်လာတာဖြစ်ပြီး နာရီလက်တံသွားသလို ဘောလုံးကိုတစ်ဦးထံတစ်ဦး အဆက်မပြတ်ပေးပို့ကာ ရွေ့လျားသွားလာတာမျိုးဖြစ်ပါတယ်။ Tiki-Taka မှာ ဘောလုံးပိုင်ဆိုင်မှုကို ဦးစားပေးသလို၊ Tik-Tok ကလည်း ဘောလုံးပိုင်ဆိုင်မှုကို ဦးစားပေးတာမှန်ပေမယ့် အနည်းငယ်ကွဲတာက မိမိခြေထဲမှာ ဘောလုံးကိုကြာကြာမထားဘဲ အလျင်အမြန်ပေးပို့ ကစားစေတာဖြစ်ပါတယ်။ လက်ရှိထိုင်းလက်ရွေးစင် အသင်းမှာ ကစားသမားအများစုဟာ ခန္ဓာကိုယ်အရွယ်အစား သေးငယ်တာကြောင့် ဒီဘောလုံးဒဿနဟာ ထိုင်းအသင်းနဲ့ အသင့်တော်ဆုံးလို့ ကိုင်တီဆက်က ပြောကြားဖူးပါတယ်။ ဥရောပကစားသမားတွေလို ကြီးမားကြံ့ခိုင်တဲ့ ခန္ဓာကိုယ်မျိုးကို မပိုင်ဆိုင်တာကြောင့် ဘောလုံးဆုံးရှုံးဖို့ လွယ်ကူတဲ့အဝေးဘော (Long Ball) ပေးပို့ကစားခြင်းထက် ဒီလိုအမြန်ပေးထိုးဖောက်နည်းက ထိုင်းအသင်းအတွက် အကောင်းဆုံးဖြစ်တယ်လို့ ကိုင်တီဆက်က ဆိုပါတယ်။ ဘောလုံးပိုင်ဆိုင်မှု များများရအောင်ကစားခြင်းဟာ ထိုင်းအသင်း အနိုင်ရဖို့ အခွင့်အလမ်းများများ ရခြင်းဖြစ်တယ်လို့ ကိုင်တီ ဆက်ကသုံးသပ်ပေမယ့် သူ့ကစားသမားတွေကို ဘောလုံးကိုင်မကစားဖို့လည်း ညွှန်ကြားထားပါတယ်။ ကိုင်တီဆက်ရဲ့ ဘောလုံးဒဿနကတော့ ဘောလုံးကို လျင်မြန်စွာရွေ့လျားပြီး တစ်ဖက်အသင်း ဂိုးပေါက်ဆီကို ရောက်အောင် ပို့ဆောင်ခြင်းပါပဲ။ ပြိုင်ဘက်ဆီက ဘောလုံးကိုရအောင်ယူ၊ တိုက်စစ်ဆင်ဖို့ လျင်မြန်စွာရွေ့လျား၊ မိမိအသင်းဖော်ဆီ ဘောလုံးကိုလျင်မြန်စွာပေး အစရှိတာတွေက လေ့ကျင့်ကွင်းမှာ ထိုင်းလက်ရွေးစင်ကစားသ မားတွေအမြဲကြားနေရတဲ့ ကိုင်တီဆက်ရဲ့ စကားသံတွေဖြစ်ပါတယ်။ ဒီလိုဘောလုံးကို လျင်မြန်စွာပေးပို့ခြင်းက မိမိခြေထဲက ဘောလုံးဖျက်ထုတ် ခံရဖို့ အခွင့်အလမ်း နည်းစေတယ်လို့ ဆိုပါတယ်။

■ Foul မဖြစ်အောင် သတိထားရမယ့် မြန်မာအသင်း

ဒါကြောင့် ထိုင်းအသင်းနဲ့ရင်ဆိုင်ရာမှာ မြန်မာကစားသမားတွေ သတိထားသင့်တာက ထိုင်းကစားသမားတွေရဲ့ ခြေထောက်ထဲက ဘောလုံးကိုရယူဖို့ ကြိုးစားရာမှာ နည်းနည်းလေးမှ နောက်မကျဖို့ပါပဲ။ One Touch Passing (တစ်ချက်ထိ အပေးအယူ) တွေကိုတွေ့ရဖို့ရှိနေပြီး ဘောလုံးဆွဲပြေးတဲ့ အချိန်တွေကလွဲလို့ ဘောလုံးအပေးအယူ လုပ်တဲ့အချိန်တွေမှာ ထိုင်းကစားသမားတွေရဲ့ ခြေထောက်ထဲ ဘောလုံးကြာကြာ မရှိနိုင်တာကြောင့် ကိုယ်အ၀င်နောက်ကျရင် လူကို Off The Ball (ဘောလုံးမပါဘဲ) ဖျက်ထုတ်မိသလိုဖြစ်ပြီး အနီ၊ အ၀ါကတ်တွေ ထိနိုင်ပါတယ်။ ဒါကြောင့်ဘောလုံးဆုံးရှုံးချိန်မှာ ထိုင်းကစားသမားတွေ ခြေထောက်ထဲက ဘောလုံးကို ရယူဖို့ထက် သူတို့ရဲ့ Passing လမ်းကြောင်းတွေကို ဖြတ်တောက်နိုင်ဖို့ အဓိကကြိုးစားရမှာပါ။ ဘောလုံးဖျက်ထုတ်မှုတွေ (Tackles) ကို ဒီပွဲမှာ တော်တော် သတိထားရမှာဖြစ်ပြီး ဘောလုံးလမ်းကြောင်းဖြတ်တောက်မှု (Interception) ကိုအဓိကထားကစားရမှာ ဖြစ်ပါတယ်။

နောက်ထပ်အရေးကြီးဆုံး အချက်ကတော့ မြန်မာအသင်းအနေနဲ့ ထိုင်းအသင်းရဲ့ High Pressing Control Game မှာ မျောပါမသွားဖို့ပါပဲ။ ဒီနောက်ပိုင်းခေတ်မှာ မြန်မာလက်ရွေးစင် ကစားသမားအများစုပါဝင်တဲ့ မြန်မာ ယူ - ၂၃ အသင်းဟာ ထိုင်း ယူ - ၂၃ အသင်းနဲ့ အဓိကကျတဲ့ ဗိုလ်လုပွဲ (၂) ပွဲ ကစားခဲ့ဖူးပါတယ်။ အဲဒါကတော့ ၂၀၀၇ ဆီးဂိမ်းစ်ဗိုလ်လုပွဲနဲ့ ၂၀၁၅ ဆီးဂိမ်းစ် ဗိုလ်လုပွဲတွေဖြစ်ပြီး ဒီပွဲ (၂) ပွဲစလုံး ထိုင်းတို့ရဲ့ကစားကွက်ကို မျောပါခဲ့တာကြောင့် ရွှေတံဆိပ်တွေနဲ့လွဲပြီး ဒုတိယနေရာတွေနဲ့သာ ကျေနပ်ခဲ့ရပါတယ်။ လက်ရှိမြန်မာလက်ရွေးစင် အသင်းမှာ ၂၀၁၅ ဆီးဂိမ်းစ် ဗိုလ်လုပွဲမှာ ပါဝင်ကစားခဲ့တဲ့ ကျော်ဇင်ဖြိုး၊ လှိုင်းဘိုဘို၊ ဖြိုးကိုကိုသိန်း၊ ဟိန်းသီဟဇော်၊ ကျော်ဇင်လွင်၊ ရဲကိုဦး၊ ကောင်းဆက်နိုင် အစရှိတဲ့ကစားသမားတွေ ပါဝင်နေပြီး ထိုင်းလက်ရွေးစင်အသင်းမှာလည်း ချာနာတစ်၊ ပီရာပတ်၊ ဆာရက်ခ်ျယူယန်း၊ ထရစ်စတန်ဒူ၊ ရန်းဂရက် အစရှိတဲ့ ကစားသမားတွေ ပါဝင်နေပါတယ်။

■ ခြေတက်လာတဲ့မြန်မာနဲ့ နောက်တန်းဟာကွက်ရှိတဲ့ ထိုင်း

မြန်မာလက်ရွေးစင်အသင်းကို ဒီပြိုင်ပွဲမတိုင်ခင် ပရိသတ်တွေ အားမရခဲ့ပေမယ့် အုပ်စုပွဲ (၃) ပွဲကစားပြီးချိန်မှာ တစ်ပွဲပြီးတစ်ပွဲ ပိုကောင်းလာသလို၊ ကစားသမားတွေကြား အချိတ်အဆက်ရှိမှု၊ နားလည်မှုပိုပြီး ပြည့်ဝ လာတာကို တွေ့ရပါတယ်။ လက်ရှိမြန်မာအသင်းရဲ့ ခြေစွမ်းက ထိုင်းအသင်းကို ကောင်းကောင်းယှဉ်နိုင်တဲ့ အရည်အသွေးရှိပြီး ထိုင်းနောက်တန်းကို ထိုးဖောက်ဂိုးသွင်းနိုင်တဲ့ တိုက်စစ်အင်အားလည်း ရှိပါတယ်။ ထိုင်းအသင်းကစားခဲ့တဲ့ အုပ်စုပွဲတွေကို ပြန်ကြည့်မယ်ဆိုရင် ထိုင်းအသင်းဟာ တိုက်စစ်ကောင်းပေမယ့် နောက်တန်းမှာ အားနည်းချက်တွေ ရှိတာကို တွေ့နိုင်ပါတယ်။ မန်စီးတီး၊ ဘာစီလိုနာအသင်းတွေလိုပဲ High Pressing ကစားတဲ့ အသင်းတွေရဲ့ အားနည်းချက်ပုံစံအတိုင်း နောက်တန်းအစွန် ကစားသမားတွေနဲ့ ခံစစ်အလယ် ကစားသမားတွေကြား၊ နောက်တန်းကစားသမားတွေနဲ့ ဂိုးသမားရဲ့ကြားမှာ Space တွေရှိနေတတ်ပြီး Quick Counter Attacking ကစားတဲ့ အသင်းတွေနဲ့တွေ့ရင် ဒီလိုအသင်းတွေဟာ ဂိုးပေးရလေ့ ရှိပါတယ်။ မြန်မာအသင်းအနေနဲ့ အောင်သူ၊ ကောင်းဆက်နိုင်၊ ဒေးဗစ်ဒန်းတို့လို လျင်မြန်တဲ့ကစားသမားတွေ ပိုင်ဆိုင်ထားတာကြောင့် ထိုင်းနောက်တန်းက နေရာလွတ်၊ ဟာကွက်တွေကို မိမိရရအသုံးချနိုင်ဖို့ပဲ လိုအပ်ပါတယ်။ မြန်မာအသင်းအတွက် နောက်ထပ်အရေးကြီးတာကတော့ တီရာဆေးလ်ဒန်ဒါ၊ ဆာရာဝပ်တို့လို အဆုံးသတ်ကောင်းတဲ့ ကစားသမားတွေကို (Clear Cut Chances) အပိုင်ဂိုး ကန်သွင်းခွင့်တွေမပေးဖို့ပါပဲ။

သေချာတာကတော့ ထိုင်းဆိုတာမြန်မာအသင်းအတွက် ကြောက်စရာအသင်း တစ်သင်းမဟုတ်ပါဘူး။ အထူးသဖြင့် မိမိမြေ၊ မိမိကွင်း၊ မိမိပရိသတ်ရှေ့မှောက်မှာ ကစားရမယ့် ပထမအကျော့ပွဲစဉ်ကို အခွင့်အရေး အပြည့်အ၀ရအောင်ယူပြီး ကစားဖို့ပဲလိုအပ်ပါတယ်။ ထိုင်းအသင်းဟာ လက်ရှိမှာအရှေ့တောင်အာရှရဲ့အကောင်းဆုံးအသင်းဆိုရင် မြန်မာကလည်း အာရှမှာအအောင်မြင်ဆုံး အရှေ့တောင်အာရှအသင်းပါ။ ဒီတော့ ထိုင်းအသင်းဟာ မြန်မာတို့အတွက် ရှိန်နေစရာ၊ အနိုင်မရစရာ အသင်းတစ်သင်းမဟုတ်ပါဘူး။ မြန်မာ့ဇာတိသွေး၊ ဇာတိမာန်ကို မြန်မာ့ လက်ရွေးစင် ကစားသမားတွေက ကွင်းထဲက မြက်ခင်းပြင်ပေါ်မှာပြ၊ မြန်မာပရိသတ်တွေက ပွဲကြည့်စင်ပေါ်မှာ ပြရင်း သုဝဏ္ဏကွင်းထဲမှာ အလောင်းမင်းတရားရဲ့ ကုန်းဘောင်မျိုးဆက်မြန်မာတို့ ရဲရဲတောက်အောင်ပွဲခံနိုင်လိမ့်မယ်လို့ ယုံကြည်နေမိပါတယ်။

Photo: Nyi Nyi Soe Nyunt ,Kaung Htet Aung &  Preimer Eleven Sports Journal